लोकांना आणि आजच्या वास्तुतज्ञांना मी एक प्रश्न विचारू इच्छितो.

जे कोण भाड्याच्या घरात किंवा भाड्याच्या वास्तुत व्यवसाय करतात त्यांची भरभराट झाली नाही का?

या प्रश्नाचे कोणाला तरी उत्तर देणे शक्य आहे का? तुम्हीच जरा शांत चित्ताने बसून विचार करा – तुमच्या मित्र परिवारात किंवा नातेवाईकांमध्ये भाड्याच्या घरात राहून भरभराट झालेले लोक नाहीत का? थोडा विचार केलात तर तुमच्या नजरेसमोर स्पष्ट चित्र उमटेल. कितीतरी लोकांनी भाड्याचे दुकान, हॉटेल घेऊन पैसे कमावून स्वत:चे घर बांधले नाही का? म्हणूनच या विषयाबद्दल तुम्हीच विचार करून पाहा.

एकदा मी बेळगावमध्ये व्याख्यान द्यायला गेलो होतो तेव्हा एक वयोवृध्द मला भेटायला आले होते. माझे एक स्वत:चे घर आहे. त्याचा तळमजला भाड्याने दिला आहे. पहिल्या मजल्यावर मी राहातो. वास्तुशास्त्राचा वापर करायचा असल्यास संपूर्ण घरात केला पाहिजे का? त्यांनी विचारले. तुम्ही ज्यावेळी तळमजला भाड्याने दिला तेव्हा पासून ते त्यांचे घर झाले. घर तुमच्याच मालकीचे असेल तरीही त्या जागेत काही बरे वाईट व्हायचे ते त्यांचे होईल. तुम्ही रहात असलेल्या जागेचाच तेवढा तुमच्यावर चांगला किंवा वाईट प्रभाव पडेल. भाड्याने रहात असलेल्यांना काहीही होणार नाही. म्हणून तुम्ही रहात असलेल्या जागेचाच वास्तुशास्त्राप्रमाणे बदल करुन घ्या. असे सांगून मी पुढे म्हणालो तुमच्या भाडेकरुंच्या जन्म दिनांकावरुन त्या घराचा दरवाजा त्यांना लाभतं असलेल्या दिशेला असल्यास त्यांची याच भाड्याच्या घरात बर्यापैकी भरभराट होईल. तसेच तुम्ही रहात असलेल्या स्वत:च्या घराचा दरवाजा तुम्हाला लाभत असलेल्या दिशेला नसेल तर त्या घरात तुमचे भले होणे अशक्य आहे. माझे बोलणे त्यांना पटले असावे. लगेच त्यांनी आपला अनुभव सांगितला. मी तळमजला भाड्याने देऊन आठ वर्ष झाली. तेथे भाड्याने राहणारे पंधरा वीस लाख रुपये कमावून गाडीतून फिरतात. परंतु घराचा मालक असणारा मी मात्र आजही सायकलवरच फिरतो.

आता तुम्हीच विचार करा. घर कोणाचे? भाड्याने कोण राहतात? लाभ कोणाला झाला? म्हणून घर किंवा व्यवसायाचे ठिकाण स्वत:चेच असणे महत्त्वाचे नाही. तुम्ही जेथे राहता तेथील वातावरण स्वच्छ करुन घेतले तरच तुमची भरभराट होणे शक्य आहे. आम्ही काही ठिकाणी सरळवास्तुप्रमाणे बदल करायला गेलो असता काही लोकांचे विचारणे विचित्र वाटायचे. आमचे घर आमच्या बायकोच्या नावाने आहे म्हणून आम्ही त्यांच्या नावाने वास्तु केलेली आहे. असे एकाने सांगितले. तेव्हा मी त्यांना प्रतिप्रश्न केला बायकोच्या नावाने वास्तु बदल केला तर मिस्टरांनी काय करायचे? मुला–मुलींनी काय करायचे? अशा प्रश्नांना उत्तर देणे कोणाला तरी शक्य आहे का? हा वास्तुपुरुष बाहेर बसून, कोणाच्या ही नावाने घराचे रजिस्ट्रेशन् आहे हे सांगा मग मी त्याचे फलित सांगतो असे सांगेल का? आता तुम्हाला समजले असावे. सरळ वास्तु स्वत:च्याच घराला नव्हे तर भाड्याचे घर किंवा व्यवसायाच्या स्थळांनाही जुळवता येईल. यापुढे असा प्रश्न तुम्हाला सतावणार नाही असे समजून पुढच्या प्रकरणाकडे जातो.